Geely Monjaro EM-i oktyabrda Paris avtosalonunda Avropa premyerasını keçirdikdən sonra rəsmi olaraq satışa çıxarıldı. Plug-in hibrid krossover Almaniyada 39 990 avrodan başlayır, ən bahalı Ultra versiyası isə 45 990 avroya qədər qalxır. Qiymətlər ölkədən ölkəyə dəyişir. Məsələn, Fransada başlanğıc qiymət 40 990 avrodur.
Model Avropada Skoda Kodiaq, Volkswagen Tayron, Toyota RAV4 və Honda CR-V ilə rəqabət aparacaq. Şassi Geely-nin Frankfurtdakı Avropa texniki mərkəzində yerli yollar üçün sazlanıb.
İki batareya, iki güc variantı
Krossover 1,5 litrlik turbomühərrik və elektrik mühərrikindən ibarət EM-i Super Hybrid sistemi ilə işləyir. Pro və Max versiyaları ön ötürücülüdür, 273 at gücü verir və 100 km/saata 7,7 saniyəyə çatır. Pro+ və Ultra isə tam ötürücülüdür. Onların gücü 335 at gücüdür, sürətlənməsi 5,8 saniyədir.
Sadə versiyalarda 18,4 kWh-lıq LFP batareya var və elektriklə 82 km yol gedir. Bahalı versiyalardakı 29,8 kWh-lıq batareya ilə bu rəqəm 116 km-ə qədər çatır. Sürətli doldurma 78 kW-a qədərdir, 30–80% doldurma təxminən 15 dəqiqə çəkir. Avtomobil elektrik cihazlarını və başqa elektromobili də doldura bilir.
Salon və təchizat
Monjaro EM-i-nin uzunluğu 4 800 mm, baqajın həcmi 633 litrdir, oturacaqlar qatlananda 1 532 litrə çatır. Bazadan qızdırılan və ventilyasiyalı ön oturacaqlar, 540 dərəcəlik kamera və 7 təhlükəsizlik yastığı təklif olunur. Yuxarı versiyalarda 25,6 düymlük proyeksiya ekranı, 16 dinamikli audio və masaj funksiyası var. Avtomobil və batareyaya 8 il və ya 200 min km zəmanət verilir.
Mənbə ecomento
