Mercedes-Benz rəhbərliyi Almaniyadakı müəssisələrə bütün əlavə sərmayələri dayandırmaq qərarı verib. Automotive News-un yazdığına görə, səbəb şirkətlə işçi nümayəndələri arasında əmək xərclərinin azaldılması üzrə danışıqların nəticəsiz qalmasıdır. Qərar işçilərə göndərilən daxili məktubda açıqlanıb.
İstehsal üzrə rəhbər Michael Schiebe bildirib ki, sərmayəni dondurmaq rəhbərliyin birgə qərarıdır. Kadrlar üzrə rəhbər Britta Seeger isə şirkətin zavodları bağlamamağa çalışdığını, amma bu ehtimalı daha ətraflı araşdırmalı olduğunu deyib. Hələlik heç bir zavodun bağlanması barədə yekun qərar yoxdur.
Hansı zavodlar təhlükədədir?
Schiebe hələ sentyabrda xəbərdarlıq etmişdi ki, məhsuldarlıq artmasa, Almaniyada bir yığım zavodu və bir mühərrik-transmissiya zavodu bağlana bilər. O zaman da konkret zavodların adı çəkilməmişdi. Mətbuatın yazdığına görə, şirkət Almaniyada əmək xərclərini təxminən 800 milyon avro azaltmaq istəyir. İşçi şurasının sədri Ergun Lümali isə bu təzyiqi qəbul etmir və güzəştləri yalnız sərmayə və iş yerlərinin qorunması zəmanəti müqabilində mümkün sayır.
Alman avtomobil sənayesi sıxılır
Ekspert Ferdinand Dudenhöffer qərarın onu təəccübləndirmədiyini deyib, çünki Mercedes uzun müddətdir Almaniyadakı ağır şəraitdən danışırdı. Çin markaları həm alman şirkətlərinin gəlirini azaldır, həm də Avropa bazarında böyüyür. Keçən həftə təchizatçı Schaeffler Avropada 3 460 iş yerini ixtisar edəcəyini və dördü Almaniyada olmaqla beş müəssisəni bağlayacağını açıqlamışdı. Roland Berger şirkəti hesab edir ki, 2030-a qədər Almaniyanın avtomobil sənayesində ən azı 200 min iş yeri itə bilər.
Mənbə Automotive News
